Jardin du Luxembourg

Dr Jardin du Luxembourg isch e staatlige Schlosspark im Bariser Quartier Latin (6. Arrondissement) mit ere Flechi vo 26 Hektare, wo früener e kööniglige Park gsii isch. D Aalag ghöört zum Palais du Luxembourg, wo dr Senaat dagt, die zweiti Kammere vom franzöösische Parlamänt.

Dr Jardin du Luxembourg isch im Norde begränzt vom Palais du Luxembourg, em chliinere Näbeschloss Petit Palais, wo dr Senaatsbresidänt si Amtssitz het, dr Orangerii und em Musée du Luxembourg, und im Oste vo dr Ecole des Mines. Er isch in zwäi Beriich iidäilt: um s Schloss het s Bluemebeet und Terrasse, wo sträng geometrisch aagläit si und scho sit em Aafang vom 17. Joorhundert e Bischbil si für die klassizistischi franzöösischi Gaardekunst, westlig und südwestlig drvo isch dr Gaarde in spöötere Zite im Stil vo de änglische Landschaftsgäärde freier gstaltet worde.